قمراي

طيفك يسامر ليلتي .. قمراي
                   يضوي عتيم الوقت نورك .. دوم
يبهج حزين الحب يا مولاي
                   يجبر كسور الخاطر المحروم
اشتاق انا يا غايتي ومْناي
                   اشتاقلك .. كثر الغلا والسوم
واشكي بعاد ٍ حدّني لاقصاي
                   أبكي خفا .. ما كن انا مضيوم .. !!
في دنيتي .. ماتو جميع احياي
                   وانت الذي حي ٍ بكل عْلوم .. !!
آسولفك .. في ضيقتي وبْكاي
                   والعن شياطين الهوا وآلوم
وآرتّب الأحزان في معناي
                   معْ ( بعثرة ) إحساسي المكلوم
غنّيت لك .. حتّى بكى مغناي
                   في (سيرة الحب) اسأل (ام كلثوم) .. !!
لك صاحب ٍ باغلى ثمن شرّاي
                   يشري غرامك .. ما يبيعك يوم
وانت الذي تسوى غلا دنياي
                   معدنْك اصيل وْ أنت قومك قوم .. !!
أذكرْك قهويت الخفوق .. رْضاي
                   واذكرني اقدع من غلاك .. سْلوم .. !!
كنت آتقطّع واتركك لاشلاي
                   وآموت بك .. وتقول لي : مرحوم ..
واثريني ارجع للحياة بـْ(راي) :
                   (إنك حياتي) والعمر مقسوم .. !!
وآبشّر بْحبك جميع اشياي
                   وآضم طيفك لا طرا بحْلوم
كنت اكتبك في دفتري (مشكاي)
                   ويْضجّ بك بحر الشعر وآعوم
وامسيت تملك كل ابو محياي
                   ولا جاب مُلكك قيصر ٍ في الروم .. !!
والله .. لو الله .. ثمْ لولاي ..
                   أهواك .. ما كان الشعر منظوم
تتسلطن بْحبّك على مبداي
                   والقلب يا تاج الشعر محكوم
يشتاقلك .. لا غبت يا ملجاي
                   يسهر .. ويبكي ليلته لـ(نْجوم) .. !!
وطيفك .. يسامر شاعرك قمراي
                   يضوي عتيم الليل نورك .. دو م .. !!