لـبـّـاسة الكبـّـوس

يا حسبي الله على لبّاسة الكبّوس
                   لبس الشمغ والعقل ما هو لهم رزّه .. !!
حبّ الخشم بدّلوه بْـ(هاي) والا (بوس)
                   تحيّة المسلمين الحين ما تْفزّه .. !!
أرجلهم اللي يحلّق شاربه بالموس
                   ماتت عوايدْه يوم الشارب يْجزّه
يْملّسون الشعر .. وينتّفون الروس
                   لو تنتصي فيه (تكفى ) .. تبطي تْهزّه
يْميّعون الكلام الحين بالمعكوس
                   متميّل ٍ بالمشي ويخافك تْكزّه
ما همّه اللي يسب اسلامنا ويدوس .. !!
                   والله ولا همّه المقدس ولا غزّه
كذّاب منهو يقول ان الرجا ميئوس
                   الهادي الله وياتي نصره بْحزّه
ربّي طلبتك تعدّل وضعنا المنكوس
                   يا رب تهدي الشباب وْ دينك تْعزّه