رحنا وطي .. !!

صباح الخير يا (فلانه) .. صباح الحب وجنوني
                   على صوتك وتغريدك .. بدا هالصبْح (زي الفل)..!!
تلبّسني شياطيني .. وتلمع في فضا كوني
                   واظن ظنون بك والبس قرون الشيطنه واسأل :
(علامك كل يوم احلى؟) الين تْجين بعيوني
                   وادوّج في ملامح حضرتك واتفلسفك .. ما مل..!!
ملاك .. اليا حضرتي ثم كسرتي لعنة قْروني
                   اثاري بس لا جيتي .. (تضيع افكار)..(يغيب الكل)
ابي يا طفلتي تدرين .. ابفضح كل مكنوني
                   ترى (رحنا وطي) في ضحكتك .. يا تل قلبي تل
كلامك .. لهجتك .. صوتك .. سواليفك يا مضنوني
                   تلجّ بْراس مفتونك .. تشل افكار راسه شل
بعيد هْناك تاخذني .. تجيب العيد بظنوني
                   تتوّهني على كيفك !! وانا ضايع .. بليّا خل ..!!
(كوارث هالطبيعه) قلتي : (إبداعاتي وفنوني)
                   أعاصيرك .. براكينك .. تزلزل قلب متزلزل
(أحبك) .. كيف ما حبك ؟! وقلبي فيك مفتوني
                   لك الله .. ما بقى عندي سوى حبّك وغاب الكل..!!