يا ملكـْـة الشعـْـر ..

يا ملكْة الشعْر .. أمرك مستجاب
                   وان طلبتي شاعرك حرْف وْ قصيد
الشعر سيف ٍ واسلّه ما أهاب
                   في حروب الحب انا خصم ٍ عنيد
إن كتبتك مرّني طيف السحاب
                   ثم تزلزل ماطر العشق المجيد
مرْحبا صبّه .. وذابت لك هضاب
                   والتضاريس اهتفت : سحرك مبيد .. !!
وش بغيتي يا معذّبْة العذاب ؟!
                   أو على قول الخواجه : (وت يو نيد) ؟!
لا بغيتي عشق ما فيه ارتياب
                   أو بغيتي وافي ٍ ما خان سيد
أو بغيتي شاعر ٍ .. شاعرْك ذاب
                   من براكين الحشا ذوّب .. جليد .. !!
وان سألتي : (وش بغيت؟) .. إنفكّ باب
                   كان مغلق وانفتح لك من جديد .. !!
لو حكيت وْ قلتلك عن هالصواب !!
                   أي صواب ؟؟ إلا جروح ٍ بالوريد .. !!
رغبتي بالوصْل والعمْر اغتراب
                   وابتسامي كذْب لو ماني سعيد .. !!
أو حقيقة دمعتي بين القراب
                   وان طرالي شي فجّرت النشيد
آتمنى وصْلك وْ لا يوم تاب
                   قلب ٍ فْحبّك بكل لحظه يزيد
رغبتي بك ساميه ما هي خراب
                   ودّي آعمّر معك بيت ٍ عتيد
آتمنّى منْك منوات الشباب
                   منْك اريد وْ ربّي يفعل ما يريد .. !!
الله اللي عالم ٍ ما عنْه غاب
                   خافي ٍ إلا ويعلم به أكيد
يعلم النيّه ويجزا بالثواب
                   ويجمع القلبين خلّاق العبيد ..
به توكّلت وْ تحمّلت الصعاب
                   وشلتلك عشق الصغير لْيوم عيد .. !!
ايه احبّك .. وانت ما بك ما يعاب
                   يا سموّ العفّه وْ طهر ٍ فريد
ايه احبّك يا عذاب ٍ للعذاب
                   منْك حتّى الهم ينهمّ وْيبيد .. !!
ما كتبتك .. لو كتبتك يا جناب
                   الملاك اللي تقلّد بالقصيد .. !!